संघीयताको सफल कार्यान्वयन अबको प्राथमिकता

नेपाल्स न्युज।

प्रमुख राजनीतिक दलका नेताहरूले संघीयताको सफल कार्यान्वयन र राजनीतिक संक्रमणकालको अन्त्य अबको प्राथमिकता भएको बताउनुभएको छ ।

राष्ट्रियसभा सदस्यको निर्वाचनमा दलका तर्फबाट उम्मेदवारी दर्ता गर्न बुधबार प्रदेश नं ४ को पोखरास्थित निर्वाचन कार्यालयमा पुगेका नेताहरूले निर्वाचनसँगै देश संविधानको कार्यान्वयन तर्फ अघि बढिसकेको बताउनुभयो ।

नेकपा (एमाले) का तर्फबाट राष्ट्रियसभा सदस्यका उम्मेदवार गणेश तिमल्सिनाले संविधानले परिकल्पना गरेअनुसारको संघीयताको सफल कार्यान्वयनका लागि आवश्यक कानुन निर्माण गर्दै देशलाई समृद्धिको मार्गमा अघि बढाउनु अबको आवश्यकता भएको बताउनुभयो ।

“सबै नेपाली आफू समृद्ध भएको हेर्न चाहन्छन्,”–उहाँले भन्नुभयो, “जनचाहनाअनुसार देशमा विधिको शासन कायम गर्दै समृद्धि र विकासका योजनालाई अघि बढाउनु अपरिहार्य छ ।”

नेपाली काँग्रेसका तर्फबाट राष्ट्रियसभा सदस्य उम्मेदवार सुरेन्द्र पाण्डेले नेपालको राजनीतिक परिवर्तनका साथै संविधान निर्माणमा नेतृत्वदायी भूमिका निर्वाह गरेको काँग्रेसले यसको सफल कार्यान्वयनमा पनि नेतृत्वदायी भूमिका निर्वाह गर्ने बताउनुभयो ।

“अबको संसद्मा काँग्रेसले जिम्मेवार प्रतिपक्षको भूमिका निर्वाह गर्नेछ”–उहाँले भन्नुभयो, “संघीयताको सफल कार्यान्वयनका साथै जनताका विकास र समृद्धिका अपेक्षालाई पूरा गराउने विषयमा हामी जिम्मेवार भएर लाग्नेछौँ ।”

नेकपा (माओवादी केन्द्र)का तर्फबाट राष्ट्रियसभा सदस्य उम्मेदवार दीनानाथ शर्माले संघीयताको कार्यान्वयन र राजनीतिक संक्रमणकालको अन्त्य गर्ने जिम्मेवारीलाई पूरा गर्नु अहिलेको आवश्यकता भएकोमा जोड दिनुभयो ।

नेपालको राजनीतिक परिवर्तनमा भएको १२ बुँदे समझदारीयता बढेको दलहरूबीचको सहकार्यको संस्कृतिलाई आगामी दिनमा पनि कायम गराउँदै देश र जनताको हितमा लाग्न प्रयत्नशील रहने उहाँले उल्लेख गर्नुभयो ।

रासस

Leave a Reply

Your email address will not be published. Required fields are marked *